火星人與金星人的對話節錄

賞: 「其實你幾時中意o左我o既o者? 」
【心想: 我當然心中有數，但係我係要你親口講呀】

昇: 「..... .... ....」
【心想: 如實講，畀你知道咁早，我咪好無型?但係講得太遲你又會詐型！都係唔回應...】
~~~ ~~~ ~~~
(註Amy是我們的共同朋友，說話溫聲軟語，性格隨和)
賞: 「喂，你覺得Amy係咪好識講o野呢呵?」
【你唔止一次讚佢溫柔o架喇，人地假惺惺你就全盤受晒！」】

昇: 「............」
【擺明係陷阱，我先無咁笨答你！】

賞: 「你唔出聲，即係默認啦....我話你知啦，你咪以為上次我同你討論有無UFO，你講親咩，佢都猛咁點頭就係認同晒你呀！佢轉頭私底下同我講，佢其實讚成我多D架......可見佢份人幾奸呀！」

昇: 「............！」
【我中意果個又唔係佢，理得佢點丫！】
~~~ ~~~ ~~~
賞: 「我呢排肥左好多呀...條腰由24去到25吋半喇！」

昇: 「咁咪忍下口唔好食咁多朱古力...」
【 老實講，真係睇唔出24同25吋半有咩分別...】

賞: 「哦！即係你都嫌我肥啦！」

~~~ ~~~ ~~~
賞: 「上次條腰粗左吋幾，我連續上左三個月瑜伽班咪瘦番o既...最衰係你！要人陪你食宵夜，果吋半又返番黎喇！」

昇: 「唔覺呀！」
【今次仲唔醒咩！】

賞: 「奸仔，講大話！」
~~~ ~~~ ~~~
昇: 「我D同事讚你...」

賞: 「讚我咩呀?」
【 終於肯借人把口讚我喇！?】

昇: 「細節我唔記得喇...」
【"余sir，你條女好得wor！"…呢句野點講你聽?】

賞: 「你....我點好你"唔記得"！?」
【讚下我你會死o既！?】

昇: 「..... ..... .... 」
~~~ ~~~ ~~~
賞: 「若果我同你流落荒島，我餓到就黎死，你會肯畀邊忽肉我食，黎續我條命?」
【呢個心理測驗，由你肯畀忽肉我食，就可以測到我響你心目中o既位置】

昇: 「照計島度一定有果樹架，無樹都一定有醬果之類食得o既植物o架，我一定會搵到畀你食o既！」
賞: (氣結)「個島D植物枯死晒喇！」
【正正經經答我唔得o既！】

昇: 「既然係島即係四面環海啦? 我釣魚畀你食！」

賞: 「流落荒島你邊得黎有魚桿同魚鉤呀！」

昇: 「我徒手都捉到魚o既wor！」

賞: 「我而家唔食魚，係要食你呀，你可唔可以老老實實咁答我，畀我食邊忽呢！」

昇: 「....點解你一定要食我呢?！」